တေႁဵတ်းႁိုဝ်သၢင်ႈ ၽိင်ႈမုၵ်ႉၸုမ်း?

ၽူႈတႅမ်ႈ - ၸၢႆးၶမ်းမိူင်း

ဝၼ်းထီႈ - 1 Jul 2026

ထွမ်ႇသဵင်ဢဝ်

လၢႆးၵေႈလိတ်ႈ လွင်ႈၶွင်ႈၶမ် ၼႂ်းၽိင်ႈမုၵ်ႉၸုမ်း

ၼူဝ်ႇၵႃႇရႅတ်ႉထႃႇ (ၸၼ်ႉၸွမ် ထႅတ်ႉသႅတ်ႉ)

ၶေႃႈႁူဝ်ႁုပ်ႈ

မူႇလိၵ်ႈဢၼ်ၼႆႉ မၼ်းထတ်းသၢင်ဝႆႉၸၼ်ႉထၢၼ်ႈငၢၼ်း လၢႆးၵေႈလိတ်ႈလွင်ႈ ၶွင်ႈၶမ် ၼႂ်းၵၢၼ်သၢင်ႈၽိင်ႈမုၵ်ႉၸုမ်းသေ ပၵ်းၸႂ်ဝႆႉဝႃႈ လွင်ႈထိုင်တီႈၽႅၼ်ၵၢၼ်ၸတ်း ၵၢၼ်လွင်ႈၶွင်ႈၶမ်ၼႆႉ မၼ်းၸၢင်ႊယုၵ်ႉမုၼ်း ၵၢၼ်ၶဝ်ႈတိၼ်ၶဝ်ႈမိုဝ်းၵၼ် ၼႂ်းၼႃႈၵၢၼ်၊ လွင်ႈႁဵတ်းၵၢၼ်လႆႈလီ လႄႈ လွင်ႈႁၢၼ်ႉၸႂ် ၵူၼ်းႁဵတ်းၵၢၼ်ၶဝ် ၸိူဝ်းၼႆႉဝႆႉယူႇ။ မူႇလိၵ်ႈၼႆႉ မၼ်းသွၵ်ႈႁႃလၢတ်ႈဝႆႉ ၽွၼ်းလီလွင်ႈၵမ်ႉၸွၺ်ႈၽိင်ႈ ဢၼ်ပၼ်သုၼ်ႇဢွၼ် လၢႆးၵေႈလိတ်ႈ လွင်ႈၶွင်ႈၶမ် ႁူမ်ႈပႃးၵၢၼ်ယုၵ်ႉမုၼ်းလွင်ႈၵပ်းသိုပ်ၵပ်းသၢၼ်၊ သၢႆၼွင်ႇလွင်ႈလဵၼ်ႈၵေႃႉ ၵၼ်လႄႈ လွင်ႈယုၵ်ႉမုၼ်းၵၢၼ်ၶူင်ႊသၢင်ႈၸိူဝ်းၼႆႉယူႇ။ မူႇလိၵ်ႈၼႆႉ မၼ်းပၼ်ဝႆႉ ၽႅၼ် ၵၢၼ်တႃႇႁဵတ်းႁႂ်ႈ တႃႇႁႂ်ႈဢဝ်တူဝ်ထူပ်း လၢႆးၵေႈလိတ်ႈလွင်ႈၶွင်ႈၶမ် မႃးပဵၼ်ၽိင်ႈမုၵ်ႉ ၸုမ်းသေ ပၵ်းၸႂ်ဝႆႉ လွင်ႈလမ်ႇလွင်ႈ ၵၢၼ်ဢွၼ်ႁူဝ်၊ ပၢင်ၽိုၵ်းၽွၼ်ႉ လႄႈ လွင်ႈပိုတ်ႇပၢင်ႇ ၵပ်းသိုပ်ႇၵပ်းသၢၼ်ၵၼ် ၸိူဝ်းၼႆႉဝႆႉယူႇ။

ၶေႃႈသိုပ်ႇမိုတ်ႈ 

လွင်ႈၶွင်ႈၶမ်ၼႆႉ မၼ်းပဵၼ်ပွတ်းဢွၼ်ႇတွၼ်ႊၼိူင်ႈ ဢၼ်ဢမ်ႇၸၢင်ႊဝႄႈလႆႈ ၼႂ်း မုၵ်ႉၸုမ်း ယူႇယဝ်ႉ။ မၼ်းလုၵ်ႉမႃးတီႈ လွင်ႈတၢင်းႁၢၼ်ထိုင်၊ ၵႃႊၶၼ် လႄႈ လွင်ႈသူင်ၸႂ် ဢမ်ႇမိူၼ်ၵၼ် ၼႂ်းၵႄႈၵူၼ်းႁဵတ်းၵၢၼ်ၶဝ် ၸိူဝ်းၼႆႉယဝ်ႉ။ ပႅၵ်ႉသမ်ႉဝႃႈ လွင်ႈၶွင်ႈၶမ်ၼႆႉ မၼ်းပဵၼ်လွင်ႈယႃႉၵဝ်းၼႆသေတႃႉ သင်ၸိူဝ်ႉဝႃႈ ၸတ်းၵၢၼ်လႆႈထိုင်တီႈၸိုင် မၼ်းၵေႃႈ ပၼ်တိုဝ်ႉတၢင်း လွင်ႈၶိုပ်ႈ ၼႃႈလႄႈ လွင်ႈၶိုၼ်ႈယႂ်ႇ ၸိူဝ်းၼႆႉယူႇ။ မူႇလိၵ်ႈၼႆႉ ပႃးဝႆႉ လွင်ႈလမ်ႇလွင်ႈထၢၼ်ႈငၢၼ်း လၢႆးၵေႈလိတ်ႈလွင်ႈၶွင်ႈၶမ် ၼႂ်းၵၢၼ်သၢင်ႈၽိင်ႈမုၵ်ႉၸုမ်း သေဢမ်ႇၵႃး ပၵ်းၸႂ်ဝႆႉဝႃႈ လၢႆးၸတ်းၵၢၼ် လွင်ႈၶွင်ႈၶမ်လႆႈလီၼႆႉ မၼ်းၸၢင်ႊႁဵတ်းႁႂ်ႈငဝ်း လၢႆးတီႈႁဵတ်းၵၢၼ် တိူဝ်းလီမႃး၊ ပၼ်ႁႅင်းလွင်ႈၵၢၼ်လဵၼ်ႈၵေႃႉၵၼ် လႄႈ ဢီးသူၼ်းႁႂ်ႈမီး လွင်ႈ ၶူင်ႊ သၢင်ႈမႂ်ႇမႂ်ႇၸိူဝ်းၼႆႉယူႇ။

လွင်ႈတုမ်ႉယွၼ်ႈ လၢႆးၵေႈလိတ်ႈလွင်ႈၶွင်ႈၶမ် ၼိူဝ်ၽိင်ႈမုၵ်ႉၸုမ်း

လၢႆးၵေႈလိတ်ႈလွင်ႈၶွင်ႈၶမ် ဢၼ်ထိုင်တီႈၼႆႉ မီးလွင်ႈႁူမ်ႇငမ်းၼိူဝ် ၽိင်ႈမုၵ်ႉၸုမ်း ဝႆႉႁႅင်း ၼႂ်းတွၼ်ႊလၢႆလၢႆတီႈဝႆႉယူႇ။ လွင်ႈၵၢၼ်ယုၵ်ႉမုၼ်း လၢႆးၵပ်းသိုပ်ႇၵပ်းသၢၼ် ၵၢၼ် ၵေႈလိတ်ႈလွင်ႈၶွင်ႈၶမ်ၼႆႉ ဢီးသူၼ်းႁႂ်ႈမီးလွင်ႈၵပ်းသိုပ်ႇၵပ်းသၢၼ် ဢၼ်သိုဝ်ႈယူဝ်း လႄႈ ပိုတ်ႇပၢင်ႇတေႃႇၵၼ်။ ပေႃးဝႃႈ မီးၵေႈလိတ်ႈလွင်ႈၶွင်ႈၶမ်ၵမ်းသိုဝ်ႈ လႄႈ မီးလွင်ႈၼပ်ႉ ထိုဝ်တေႃႇၵၼ်ၸိုင် ၵူၼ်းႁဵတ်းၵၢၼ်ၶဝ်ၵေႃႈ တေပိုတ်ႇၼေလွင်ႈတၢင်းႁၼ်ထိုင်ၶဝ် ၸႅင်ႈၸႅင်ႈလႅင်းလႅင်းသေ ထွမ်ႇပႃးတၢင်ႇၵေႃႉယဝ်ႉ။ ဢၼ်ၼႆႉ မၼ်းတေႁဵတ်းႁႂ်ႈမီးမႃး ၽိင်ႈဢၼ် မီးလွင်ႈၸႅင်ႈလႅင်းတေႃႇၵၼ်သေ မီးလွင်ႈပိၼ်ႇဝၢႆႇၼပ်ႉထိုဝ်ၵၼ် ၼၼ်ႉယဝ်ႉ။ လွင်ႈၵၢၼ် လဵၼ်ႈၵေႃႉၵၼ်လႆႈလီၼႆႉ ၸၢင်ႊၵေႈလိတ်ႈလွင်ႈၶွင်ႈၶမ် လၢႆးတၢင်းဢၼ်လီ လႄႈ ၸွၺ်ႈ သၢင်ႈလွင်ႈယုမ်ႇယမ်ၼိူဝ်ၵၼ် ဢိၵ်ႇတင်းသၢင်ႈႁႂ်ႈၵၢၼ် လဵၼ်ႈၵေႃႉၼႂ်းၵႄႈၵူၼ်း ႁဵတ်းၵၢၼ်ၶဝ် တိူဝ်းၵႅၼ်ႇၶႅင်မႃး ၼၼ်ႉယဝ်ႉ။ ပေႃးဝႃႈ မီးၵၢၼ်ၵေႈလိတ်ႈလွင်ႈၶွင်ႈၶမ်ထိုင်တီႈၸိုင် မၼ်းတေႁဵတ်းႁႂ်ႈ တိူဝ်းမီးမႃးလွင်ႈပွင်ႇၸႂ်ၵၼ် လႄႈ ၵၢၼ်ႁူမ်ႈမိုဝ်းၵၼ်သေ ပဵၼ်ၵၢၼ်ၸွၺ်ႈ ၵမ်ႉထႅမ်ၸူးတေႃႇ ငဝ်းလၢႆးႁဵတ်းၵၢၼ်လႆႈလီ ၼၼ်ႉယူႇ။

  လွင်ႈယုၵ်ႉမုၼ်း ၵၢၼ်ၶူင်ႊသၢင်ႈ ႁႃလၢႆးတၢင်းၵေႈလိတ်ႈလွင်ႈၶွင်ႈၶမ်လီၼႆႉ မၼ်း ၸၢင်ႊဢီးသူၼ်းႁႂ်ႈမီးမႃး လွင်ႈၶူင်ႊသၢင်ႈမႂ်ႇ လူၺ်ႈပၼ်ႁႅင်းတၢင်းႁၼ်လၢႆလၢႆၾၢႆႇသေ ႁႃ လၢႆးတၢင်း တႃႇၵေႈလိတ်ႈလွင်ႈၶွင်ႈၶမ်ယူႇယဝ်ႉ။ ပေႃးဝႃႈ ၵူၼ်းႁဵတ်းၵၢၼ် ၶဝ်ယိၼ်း ႁူႉလွတ်ႈၽေး တႃႇလၢတ်ႈဢွၵ်ႇတၢင်းႁၼ် ဢၼ်ပႅၵ်ႇပိူင်ႈၵၼ်ၼၼ်ႉၸိုင် မၼ်းၸၢင်ႊဢွၼ် ႁႂ်ႈမီးမႃး လွင်ႈႁုၼ်ႈမုၼ်းပၢႆးဝူၼ်ႉမႂ်ႇ လႄႈ လၢႆးၵေႈလိတ်ႈလွင်ႈၶွင်ႈၶမ်သေ ၸုင်ၸၼ်မုၵ်ႉ ၸုမ်းၵႂႃႇတၢင်းၼႃႈ ယူႇယဝ်ႉ။ လွင်ႈႁဵတ်းၵၢၼ်ၶဝ်ႈတိၼ်ၶဝ်မိုဝ်းၵၼ်သေ မီးလွင်ႈထိုင်တီႈ ၼႂ်းၵၢၼ်ၵေႈလိတ်ႈလွင်ႈၶွင်ႈၶမ်ၼႆႉ ၸွၺ်ႈႁႂ်ႈမီးမႃးငဝ်းလၢႆး ႁဵတ်းၵၢၼ်ၶဝ်ႈတိၼ်ၶဝ်ႈ မိုဝ်းသေ လူတ်းယွမ်းလွင်ႈၶဵင်ႈၶႅင်တေႃႇၵၼ် လႄႈ ႁႄႉႁမ်ႈလွင်ႈထဵင်မေႃးၵၼ်ၸိူဝ်းၼႆႉ ယူႇယဝ်ႉ။ ၽိင်ႈဢၼ်ပၼ်သုၼ်ႇဢွၼ် တႃႇလၢႆးၵေႈလိတ်ႈလွင်ႈၶွင်ႈၶမ်ထိုင်တီႈၼႆႉ ၸၢင်ႊႁဵတ်းႁႂ်ႈ ငဝ်းလၢႆးႁဵတ်းၵၢၼ်လႆႈလီၼၼ်ႉ သိုပ်ႇၵႂႃႇၶၢဝ်းယၢဝ်းလႆႈယူႇယဝ်ႉ။ ပေႃးဝႃႈ ၵူၼ်းႁဵတ်းၵၢၼ်ၶဝ် ဝူၼ်ႉဝႃႈ လွင်ႈတၢင်းပိူၼ်ႈသႂ်ႇၸႂ် တၢင်းမႆႈၸႂ်ၶဝ်သေ  ၵေႈလိတ်ႈပၼ်ၸိုင် ၶဝ်တေတိူဝ်းမီးလွင်ႈႁၢၼ်ႉၸႂ် ၸွမ်းၵၢၼ်ၶဝ် လႄႈ ၶဝ်တေသိုပ်ႇႁဵတ်းၵၢၼ်ၸွမ်းမုၵ်ႉၸုမ်း ၵႂႃႇယူႇ။ လွင်ႈႁၢၼ်ႉၸႂ်ၶဝ်ၼႆႉ တေႁဵတ်းႁႂ်ႈမီးမႃး လွင်ႈၵၢၼ်ၶဝ်ႈဢွၵ်ၵၼ်လႆႈလီသေ တေ ႁဵတ်းႁႂ်ႈၶဝ်သိုပ်ႇယူႇ ၼႂ်းမုၵ်ႉၸုမ်းၵႂႃႇၶၢဝ်းယၢဝ်း၊ ယွၼ်ႉပိူဝ်ႈဝႃႈ ၶဝ်လႆႈထုၵ်ႇပိူၼ်ႈဝႆႉၵႃႊၶၼ် လႄႈ ၵမ်ႉထႅမ်ၼၼ်ႉယဝ်ႉ။

ၽႅၼ်ၵၢၼ်တႃႇ ႁဵတ်းႁႂ်ႈလၢႆးၵေႈလိတ်ႈလွင်ႈၶွင်ႈၶမ် ပဵၼ်ၽိင်ႈမုၵ်ႉၸုမ်းမႃး

တွၼ်ႊတႃႇတေ ႁဵတ်းႁႂ်ႈတူဝ်ထူပ်းလၢႆးၵေႈလိတ်ႈလွင်ႈၶွင်ႈၶမ် ပဵၼ်မႃးၽိင်ႈမုၵ်ႉ ၸုမ်းလႆႈထိုင်တီႈၼၼ်ႉ  လူဝ်ႇဝူၼ်ႉတူၺ်းၽႅၼ်ၵၢၼ် ပႃႈတႂ်ႈၼႆႉယူႇ။ ၽူႈဢွၼ်ႁူဝ်ဢၼ်မီး လမ်ႉၵတ်ႉလွင်ႈတင်ႈၸႂ်ၵၢၼ် ဢွၼ်ႁူဝ်လီၼႆႉ လမ်ႇလွင်ႈတႃႇသၢင်ႈၽိင်ႈၸႂ် လၢႆးၵေႈလိတ်ႈ လွင်ႈၶွင်ႈၶမ်တေႉတေႉ။ ပေႃးၽူႈဢွၼ်ႁူဝ် ၼေလႆႈလွင်ႈၵၢၼ်တူင်ႉၼိုင်တူဝ်ယၢင်ႇ လၢႆး ၸတ်းၵၢၼ်လွင်ႈၶွင်ႈၶမ် လႄႈ ၼေၽိင်ႈတူၼ်ႈၸႂ် လၢႆးၵေႈလိတ်ႈလွင်ႈထဵင်မေႃးၵၼ်လႆႈ ၸိုင် ၶဝ်တေႁူမ်ႇငမ်းလႆႈ ၽိင်ႈမုၵ်ႉၸုမ်းတင်းလုမ်ႈလႆႈယူႇ။ ပၢင်ၽိုၵ်းၽွၼ်ႉ လႄႈ ၵၢၼ် ယုၵ်ႉလမ်ႉၵတ်ႉၼႆႉ တေႁဵတ်းႁႂ်ႈၵူၼ်းႁဵတ်းၵၢၼ်ၶဝ် မီးမႃးၼမ်ႉၵတ်ႉ ၵၢၼ်ၵေႈလိတ်ႈ လွင်ႈၶွင်ႈၶမ်လႆႈယူႇ။ ပၢင်ဢုပ်ႇဢူဝ်း၊ ပၢင်တၢၼ်ႈၶႆႊ လႄႈ ၵၢၼ်ၽိုၵ်းႁဵတ်းတူဝ်ထူပ်း ၸိူဝ်းၼႆႉ တေၸၢင်ႊႁဵတ်းႁႂ်ႈၵူၼ်းႁဵတ်းၵၢၼ်ၶဝ် လဵပ်ႈႁဵၼ်းလႆႈ လၢႆးတၢင်းတႃႇၸတ်းၵၢၼ် လွင်ႈၶွင်ႈၶမ်ႁႂ်ႈပေႃးထိုင်တီႈ လႄႈ ၶဝ်းတၢင်းတိုဝ်းလႆႈလီငၢမ်း ၼၼ်ႉယူႇ။

လွင်ႈမီးၵၢၼ်ပိုတ်ႇပၢင်ႇ တင်း ၵၢၼ်ၵပ်းသိုပ်ႇၵပ်းသၢၼ်ၵၼ်လႆႈၼႆႉ တေပိုတ်ႇတၢင်း ပၼ် ၵူၼ်းႁဵတ်းၵၢၼ်ၶဝ် ႁႂ်ႈပေႃးမီးတီႈဢၼ်ၶဝ်ၶုၺ်ႉႁၼ်သႃႇလူမ်ၸႂ် တႃႇဢူဝ်ႇဢူဝ်း လွင်ႈၶွင်ႈၶမ် ၼၼ်ႉယူႇယဝ်ႉ။ ၵၢၼ်ပၼ်ႁႅင်း ၽိင်ႈဢၼ်ပၼ်လွင်ႈတုမ်ႉတွပ်ႇ လႄႈ လွင်ႈ ဢုပ်ႇဢူဝ်းၵၼ်ၼႆႉ ႁဵတ်းႁႂ်ႈလပ်ႉလွင်းဝႃႈ ၵူၼ်းႁဵတ်းၵၢၼ်ၶဝ်ႁူႉ လွင်ႈပိူၼ်ႈသႂ်ႇၸႂ်တေႃႇ လႄႈ ၵေႈလိတ်ႈပၼ် ၶေႃႈမႆႈၸႂ်ၶဝ်ဝႆႉယူႇ ၼႆယဝ်ႉ။  လွင်ႈမီးလၵ်းၼမ်းဢၼ်ၸႅင်ႈလႅင်း လႄႈ ၶၵ်ႉတွၼ်ႊၵၢၼ်မၼ်းၸိူဝ်းၼႆႉ ပဵၼ်ၽွၼ်းလီတႃႇ ၵၢၼ်ၵေႈလိတ်ႈလွင်ႈၶွင်ႈၶမ်ယဝ်ႉ။ လူဝ်ႇႁဵတ်းႁႂ်ႈၵူၼ်းႁဵတ်းၵၢၼ်တင်းမူတ်း ႁူႉၶၵ်ႉတွၼ်ႊဢၼ်လူဝ်ႇလႆႈႁဵၼ်း ၽွင်းလွင်ႈၶွင်ႈ ၶမ် ၵိူတ်ႇပဵၼ်မႃး လႄႈ ႁႂ်ႈႁူႉပႃး ဝႃႈမီးဢီႈသင်တေၸွၺ်ႈလႆႈ တႃႇၵေႈလိတ်ႈလွင်ႈၶွင်ႈၶမ်။ လွင်ႈၶဝ်ႈၵႄႈၵေႈပၼ်၊ လွင်ႈၸွင်းၸေးၵမ်ႉထႅမ်ပၼ် လႄႈ ယူင်ႉၵမ်ႉထႅမ်ၸိူဝ်းၼႆႉ တေ ၸွၺ်ႈပၼ် ႁႂ်ႈၵူၼ်းႁဵတ်းၵၢၼ်ၶဝ် ၵေႈလိတ်ႈလွင်ႈ ၶွင်ႈၶမ်လႆႈယူႇ။ လွင်ႈပိုတ်ႇ တၢင်းပၼ် ၸုမ်းၵူၼ်းထီႉသၢမ် ဢၼ်ယူႇပဵၼ်ၵၢင်ႊမၼ်း၊ ၼင်ႇၽူႈလူင်ႉလႅၼ်ႇႁႅင်းတိုၼ်းၵူၼ်း ဢမ်ႇၼၼ် ၽူႈၶဝ်ႈၵႄႈၸွၺ်ႈယူႇၵၢင်ႊ တေၸွၺ်ႈႁႂ်ႈ မီးလၢႆးတၢင်းၵေႈလိတ်ႈလွင်ႈၶွင်ႈၶမ် ဢၼ်မီးလွင်ႈတြႃး လႄႈ ဢၼ်ဢမ်ႇၸွမ်းၾၢႆႇၼၼ်ႉလႆႈယူႇ။

ၶေႃႈလူပ်းလိုၼ်း

လၢႆးတၢင်းၵေႈလိတ်ႈလွင်ႈၶွင်ႈၶမ်ၼႆႉ ပဵၼ်ပွတ်းဢွၼ်ႇ တွၼ်ႊလမ်ႇလွင်ႈတွၼ်ႊ ၼိူင်ႈ ၼႂ်းၵၢၼ်သၢင်ႈၽိင်ႈမုၵ်ႉၸုမ်းသေ မၼ်းႁူမ်ႇငမ်းလွင်ႈ ၵၢၼ်ၵပ်းသိုပ်ႇၵပ်းသၢၼ်ၵၼ်၊ လွင်ႈလဵၼ်ႈၵေႃႉၵၼ်၊ လွင်ႈၶူင်ႊသၢင်ႈမုၼ်းမႂ်ႇ၊ လွင်ႈၶဝ်ႈတိၼ်ၶဝ်ႈမိုဝ်းၵၼ်တီႈၵၢၼ် လႄႈ လွင်ႈပဵၼ်းပေႃးႁၢၼ်ႉၸႂ် ၵူၼ်းႁဵတ်းၵၢၼ်ၶဝ် ၸိူဝ်းၼႆႉယဝ်ႉ။ ပေႃးပၼ်လွင်ႈသုၼ်ႇဢွၼ် လၢႆးတၢင်းၸတ်းၵၢၼ်လွင်ႈၶွင်ႈၶမ် ဢၼ်ထိုင်တီႈ လႄႈ ႁႂ်ႈမီးတူဝ်ထူပ်း လၢႆးၵေႈလိတ်ႈ လွင်ႈၶွင်ႈၶမ် မႃးပဵၼ်ၽိင်ႈမုၵ်ႉၸုမ်းၸိုင် ႁူင်းၵၢၼ်ၶွမ်ႇပၼ်ႇၼီႇၸိူဝ်းၼႆႉ တေၸၢင်ႊသၢင်ႈ လႆႈ ငဝ်းလၢႆးႁဵတ်းၵၢၼ်လီ ဢၼ်တိူဝ်းမီး လွင်ႈယဝ်ႉတူဝ်ၵၢၼ်လႄႈ ၶဝ်ႈတိၼ်ၶဝ်ႈ မိုဝ်းၵၼ် ၼၼ်ႉယဝ်ႉ။ ယွၼ်ႉပိူဝ်ႈဝႃႈ မုၵ်ႉၸုမ်းၼႆႉ မၼ်းလႆႈသိုပ်ႇၶတ်းၸႂ်ၶၢမ်ႈပူၼ်ႉ လွင်ႈသုၵ်ႉ ယုင်ႈငဝ်းလၢႆး ၵၢပ်ႈပၢၼ်ယၢမ်းလဵဝ် လႄႈ ၵၢၼ်ယွမ်းႁပ်ႉလၢႆးၵေႈလိတ်ႈလွင်ႈၶွင်ႈၶမ်ႁႂ်ႈ မႃးပဵၼ်ၽိင်ႈၵႅၼ်ၸႂ်ၵႃႊၶၼ်မုၵ်ႉၸုမ်းၼႆႉ မၼ်းလမ်ႇလွင်ႈ တႃႇလွင်ႈၶိုၼ်ႈယႂ်ႇ၊ လွင်ႈၶူင်ႊ သၢင်ႈမုၼ်းမႂ်ႇ လႄႈ လွင်ႈဢွင်ႇမၢင်ႇၶၢဝ်းယၢဝ်း ၼၼ်ႉယဝ်ႉ။